بسم الله الرحمن الرحيم
"" ان الله لا يُضيع اجرَ من احسن عملاً ""صدق الله العظيم
فى وقت المذاكرة كل واحد مننا محتاج انه يفكر فى قدراته ويثق فى نفسه لكن قبل كل دا لازم يثق فى الله سبحانه وتعالى
وان ربنا لازم هيجازيه خير على تعبه ومذاكرته
محتاجين نعرف نصايح مهمة عشان نقدر نستفيد اكبر قدر ممكن من مذاكرتنا
عن طريق
تنظيم الوقت بشكل صحيح
تجزأة المادة بشكل فعال
وضعية الجلوس للمذاكرة الصحيحة
التهيأة الذهنية
الحفاظ على التركيز وتجديد الطاقة
تنظيم الوقت
---------------
فى وقت الامتحانات بنحتاج كل دقيقة عشان نعوض الوقت الكتير اللى ضاع خلال السنة
عشان كدا من اهم اسس ادارة الوقت انك تحلل يومك بتقضيه ازاى
وتشوف اى نشاط بتعمله بيستهلك منك وقت قد ايه
وابدأ اعمل لنفسك قائمة فيها اهم النشاطات اللى مطلوب منك تعملها فى اليوم
ويفضل انك تحدد معادها
يعنى مثلا مواعيد الوجبات
الصلاوات اللى هتقضيها فى البيت او فى المسجد
هتلاقى فى وقت منفصل بين الصلاوات او بين الوجبات
وفى وقت طويل متواصل
وهنا هحتاج تجزأ المادة
-------------------------
فى وقت زي كدا بنكون معانا ملخصات وورقت كورسات
بعضهم بيكون فيه اجزاء كبيرة وبعضهم بيكون بسيط
دايما وانت بتنظم وقت الاجزاء ديه خلى الاجزاء البسيطة فى الاوقات الصغيرة
زي بين مواعيد الصلاة او مواعيد الكورسات
بحيث انك متضطرش تقطع تركيزك وانت مش جاهز
اما الاجزاء المهمة خليها دايما فى الفترة اللى بتكون فيها فاضي لمدة طويلة
كل جزء تخلصه اكتب عليه تعليق
هل انت راضى تماما عن مذاكرتك للجزء دا ولا محتاج تعيد عليه ولا فى جزء حاسس انك مش مستوعبه قوي
وادخل فى اللى بعده
وضعية الجلوس الصحيحة للمذاكرة
--------------------------------------
معظمنا بيهمل النقطة ديه رغم انها مهمة جداا
لان وضعية جلوسك هتأثر على احساسك بالارتياح وقدرتك على التركيز
انما لو قاعد فى وضعية غلط هتزداد توتر وقلق بسبب عدم احساسك بالارتياح
لازم وانت بتذاكر يتوافر 3 شروط
1- سطح مستوي ( مكتب او ترابيزة
2- كرسي مريح ( ممكن تعدل اى كرسي بزيادة او تقليل المساند
3 - اضاءة مناسبة لعدم التعرض لاجهاد العين
لازم وانت قاعد يكون ضهرك مفرود والعمود الفقرى مستوي
رجلك تكون متعامدة مع مسند المقعد ويستحسن انها لا تكون ممددة ولا متشابكة على بعضها
التهيأة الذهنية
----------------
اول نقطة مهمة فى التهيأة الذهنية هى انك تسعيذ بالله من الشيطان وتحاول لمدة 10 دقايق انك تسترخى وتنظم تنفسك وتبدأ بتعمل
self motivator تحفيز ذاتى لنفسك
فكر فى انك عندك القدرات الذهنية والذكاء الكافى انك تستوعب المادة
انك نظمت وقتك بشكل صح وبالتالى هتقدر تنجز المادة بشكل كويس جداا
وان الامتحان هيكون سهل بالنسبة ليك وبيغطى كل الاجزاء اللى انت ذاكرتها
حفز نفسك بشكل ايجابي ووقاوم الافكار السلبية اللى هتمتص طاقتك
زي مش هلحق اخلصها
المادة ديه صعبة
الامتحان هيجي صعب
فى الواقع انت لسة ممتحنتش فحفز نفسك وذاكر كويس واقتنع انك مذاكرتك هتسهل عليك الامتحان مهما كان طويل او مش سهل
واعرف ان الشخص المتميز دايما بيحب بيجتاز الامور الغير بيسطة ومش سهلة ودا سر التميز
تانى حاجة ( اه كل دا اول حاجة بس ) فى حركة اغلبنا بنعملها وتأثيرها سلبي جداا
وهو اننا قبل ما نبدأ بنبص على كمية الورق اللى هنذاكرها ونبدأ نبص لها على انها كبيييرة
تانى حاجة كل جزء بنخلصه بنبص على اللى باقي عشان نشوف فاضل قد ايه
كل التصرفات ديه هى نواه الطاقة السلبية وسببها الملل من المذاكرة
وبالتالى كل لما هتبص على اللى فاضل هيزيد الملل جواك
وتفضل تقول بعد كل اللى ذاكرته دا ولسة كل دا باقى
وديه خطوة كبيرة جداا فى تشويش التركيز عشان كدا
حاول تركز فى الجزء اللى بتذاكره ولما تخلصه زي ما قولنا فى البداية حط تقييم ليه
وسيبه وخد بريك بسيط وادخل على اللى بعده
وفى حاجة مهمة جداا
مفروض انك جزأت المادة على حسب مواعيدك يستحسن ان فى كل جلسة هتذاكر فيها
يكون معاك الجزء الخاص بيها بس
عشان ميكونش في فرصة انك تعمل حصر ذاكرت قد ايه وفاضل قد ايه
اخر نقطة وهى انك تعرف الفرق بين بؤرة التركيز وهامش التركيز
بؤرة التركيز هى المرحلة اللى بيوصل فيها تركيزك لاعلى معدلاته بحيث انه بيفصلك عن اى شئ حواليك يعنى فى البيت لو جابو طبل ومزامير انت ولا هتحس
زي بالزبط درجة الخشوع فى الصلاة .. لما بتوصل للخشوع الكامل وبتتوحد بكل احساسك وتركيزك مع القرآن بين ايد ربنا سبحانه وتعالى انت كدا بتكون فى بؤرة التركيز
طيب هامش التركيز .
هو انك قاعد عينك فى الكتاب وودنك مع كل المؤثرات اللى حواليك واقل حركة او صوت تلفت انتباهك وتخرجك من تركيزك دا لو انت قدرت تركز فى اللى بتذاكرة .. هامش التركيز هى حالة تشويش ذهني هتقلل كتير من سهولة استيعابك للمادة اللى بتذاكرة
وبالتالى فى الامتحان لما تيجي تستعدى المعلومات اللى ذاكرتها هتحس بردو بتشويش
مش هتفتكرها قوى ويمكن كمان لما تيجي تفتكرها هتفتكر وقتها الحاجة اللى حصلت وشتت تركيزك ساعتها
اخر حاجة وهى جدد طاقتك
------------------------------
مهما كانت درجة ذكاءك واستيعابك المخ بيحتاج انه يفصل شوية ويرتاح
ودا مش فى المذاكرة بس دا فى كل حاجة فى حياتك بس خلينا نركز على الجزء الخاص بالمذاكرة
لو فضلت تضغط فى مخك وتواصل المذاكرة لعدد طويل من الساعات بدون وقت للراحة مخك هيجهد وهيفصلك هو بانك مهما تقرا مش هتقدر تستعوب او تفهم اللى بتقراه وهتبدأ تحس بصداع او اجهاد وبالتالى لما هتبعد عن المذاكرة هتبعد وقت طويل
لكن عشان تسهل لنفسك
لما تاخد الجزء اللى هتذاكره جزؤه هو كمان
وخلي بين كل جزء وجزء راحة ولو 10 دقايق
وفى ال 10 دقايق دول
اتحرك من مكانك ابعد عن مكان المذاكرة
ممكن تقف فى شباك تجدد الهوا اللى بتستنشقه
او تروح تعمل مشروب يزود طاقتك تانى ( ويفضل البعد عن المنبهات والكافيين) حاول تكون عصاير طبيعية او اعشاب
ممكن كمان فى العشر دقايق دول حرك جسمك بحركات رياضية بسيطة
لما هترجع تانى تكمل مذاكرة هتلاقى ان نشاطك اتجدد وهتحس من نفسك انك عايز تواصل المذاكرة لساعات
اخر حاجة ويمكن ديه مهمة جداااااا
مواعيد النوم
انا اولكم بعترف انى مكنتش برتاح غير فى مذاكرة الليل
لكن بجد تأثير السهر والمذاكرة بالليل كانت بتجهدنى باقي النهار وبحس انى مش قادرة اركز فى اى حاجة
ومعاكم بردو ان وقت بليل دا بيكون هدوء اكتر
لكن الاصح
ان تبدأ تذاكر من بعد الفجر
بيكون بردو الجو هادى وخصوصا لو بعد ما بتصلى الفجر بتكون فى حالة صفاء ذهن وراحة فهتقدر انك تستجمع تركيزك بشكل كويس جداا
الاهم من كل دا انك تنام كويس
ربنا سبحانه وتعالى قال
"وَهُوَ الَّذِي جَعَلَ لَكُمْ اللَّيْلَ لِتَسْكُنُوا فِيهِ وَالنَّهَارَ مُبْصِرًا"
التوازن الطبيعي لمخك وجسمك هو انك تنام بليل
ويفضل يكون عدد ساعات نومك من 6 الى 8 ساعات
لو نظمت وقتك صح وعدد ساعات ووقت نومك صح
ووقت مذاكرتك صح
هتلاقى جسمك وذهنك فى غاية الاستعداد للمذاكرة
واعرف دايما ان لكل مجتهدٍ نصيب
اتمنى يكون الموضوع بسيط وسهل
واتمنى لكم كلكم النجاح والتوفيق باذن الله
